Heilsugæsla

Heilsuvernd skólabarna í Árskóla er á vegum Heilbrigðisstofnunar Norðurlands (HSN) á Sauðárkróki. 

Hjúkrunarfræðingar skólaárið 2026-2027 eru tveir:

Sylvía Sif Halldórsdóttir sylvia.sif.halldorsdottir@hsn.is

Ásta Kristín Árnadóttir asta.kristin.arnadottir@hsn.is

Þær skipta með sér vikum í skólanum og eru viðverutímar breytilegir eftir því hvor er með viðveru þá vikuna.

Sylvía er með viðveru aðra hvora viku kl. 8 - 14 mánudaga til fimmtudaga.

Vikurnar á móti er Ásta með viðveru kl. 8 - 13 mánudaga til fimmtudaga.

Engin viðvera hjúkrunarfræðings er á föstudögum.

Heilsuvernd skólabarna

Heilsuvernd grunnskólabarna er hluti af þjónustu heilsugæslunnar og framhald af ung- og smábarnavernd. Markmiðið er að efla heilbrigði nemenda og stuðla að vellíðan þeirra. Unnið er í náinni samvinnu við forsjáraðila nemanda, skólastjórnendur, kennara og aðra sem koma að málefnum nemenda með velferð þeirra að leiðarljósi.

Helstu áherslur í heilsuvernd skólabarna eru forvarnir, heilbrigðisfræðsla, skimanir og bólusetningar. Unnið er samkvæmt leiðbeiningum Þróunarmiðstöðvar íslenskrar heilsugæslu um heilsuvernd grunnskólabarna.

Samkvæmt lögum er öll vinna heilsugæslunnar skráð í rafræna sjúkraskrá.

Frekari upplýsingar um heilsuvernd skólabarna má finna hér: Heilsuvernd grunnskólabarna

Fræðsla

Skipulögð heilbrigðisfræðsla er veitt í öllum árgöngum og er áherslan á að hvetja til heilbrigðra lífshátta. Eftir fræðslu fá forsjáraðilar upplýsingar í tölvupósti um fræðsluna. Þá gefst þeim kostur á að ræða við börnin um það sem þau lærðu og hvernig hægt er að nýta það í daglegu lífi.

Viðtöl

Heilsueflandi einstaklingsviðtöl fara fram í 1., 4., 7. og 9. bekk, gjarnan í tengslum við skimanir. Þar ræðir hjúkrunarfræðingur við nemendur um líðan og lífsvenjur. Markmið þessara viðtala er að styrkja vitund nemenda um eigið heilbrigði og líðan. Gripið er til úrræða ef vart verður við vanlíðan eða áhyggjur.

Skimanir

Skimað er í 1., 4., 7. og 9. bekk fyrir fráviki í vexti og sjónskerpu. Ef grunur er um heilbrigðisvanda samkvæmt niðurstöðum skimana er haft samband við forsjáraðila. Niðurstöður skimana eru skráðar í rafræna sjúkraskrá heilsugæslunnar.

Nemendur í öðrum árgöngum eru skoðaðir ef þurfa þykir og í samráði við forsjáraðila.

Bólusetningar

Í 7. bekk er bólusett við mislingum, hettusótt og rauðum hundum og einnig er bólusett gegn HPV (Human papilloma veirum) sem geta valdið leghálskrabbameini og kynfæravörtum.

Í 9. bekk er bólusett við barnaveiki, stífkrampa, kíghósta og mænusótt.

Áður en kemur að bólusetningu er sendur tölvupóstur til forsjáraðila með upplýsingum um tímasetningu.

Hafið samband við skólahjúkrunarfræðing ef:

•          Nánari upplýsinga er óskað
•          Talið er að barn sé ekki að fullu bólusett
•          Óskað er eftir því að barn sé ekki bólusett

          

Slys og óhöpp á skólatíma

Hjúkrunarfræðingur veitir fyrstu hjálp í skólanum og er starfsfólki skólans til stuðnings og ráðgjafar þegar upp koma veikindi og slys hjá nemendum, á þeim tíma sem hjúkrunarfræðingur er við störf.

Þurfi nemandi að fara á heilsugæslustöð eða bráðamóttöku skulu foreldrar/forráðamenn fara með barninu. Því er mikilvægt að skólinn hafi öll símanúmer svo hægt sé að ná í foreldra á skólatíma barnsins.

Langveik börn

Mikilvægt er að hjúkrunarfræðingur í heilsuvernd skólabarna viti af börnum sem eru með fötlun eða langvinnan og/eða alvarlega sjúkdóma, s.s. sykursýki, ofnæmi, flogaveiki, blæðingarsjúkdóma eða aðra alvarlega sjúkdóma. Hlutverk hjúkrunarfræðingsins í heilsuvernd skólabarna er að skapa þessum börnum viðeigandi aðstæður og umönnun í skólanum í samvinnu við foreldra/forsjáraðila og starfsfólk skólans.

Lyfjagjafir

Samkvæmt tilmælum landlæknis um lyfjagjafir í grunnskólum eru sérstakar vinnureglur varðandi lyfjagjafir til nemenda á skólatíma. Mikilvægt er að forsjáraðilar barna sem þurfa að taka lyf á skólatíma hafi samband við hjúkrunarfræðing í skólanum.